Сипаттама
Дәрілік затты медициналық қолдану
жөніндегі нұсқаулық
Тиотриазолин®
Саудалық атауы
Тиотриазолин®
Халықаралық патенттелмеген атауы
Тиазот қышқылы
Дәрілік түрі
Вена ішіне, бұлшықет ішіне енгізуге арналған25 мг/мл ерітінді
Құрамы
1 мл ерітіндінің құрамында
белсенді зат: 100% затқа шаққанда 25 мг тиазот қышқылы морфолиний тұзының ерітіндісі бар, бұл 16,6 мг тиазот қышқылына баламалы;
қосымша зат -инъекцияға арналған су.
Сипаттамасы
Мөлдір, түссіз немесе сәл сарғыш реңді сұйықтық.
Фармакотерапиялық тобы
Жүрек ауруларын емдеуге арналған басқа да препараттар. Басқа да кардиотонустық препараттар. Тиазот қышқылы.
АТХ коды С01ЕВ23
Фармакологиялық қасиеттері
Фармакокинетикасы
Тиозит қышқылы қан плазмасында ең жоғары концентрациясына бұлшықет ішіне енгізгенде 0,84 сағаттан соң, вена ішіне енгізгенде 0,1 сағаттан соң жетеді. Қан ақуыздарымен байланысуы 10%-дан аспайды. Тиазот қышқылы көбіне бүйректе 31% жиналады. Ол жуан ішекте, жүректе, көкбауырда едәуір мөлшерде, жіңішке ішекте және өкпеде бәрінен азырақ (1-2 %) жиналады.
Фармакодинамикасы
Тиазот қышқылының фармакологиялық әсері ишемияға қарсы, жарғақшаны тұрақтандыратын, антиоксиданттық және иммуномодуляциялаушы әсерімен жүзеге асырылады. Препараттың әсері анаэробтық гликолиздің компенсаторлық белсенділенуі және АТФ жасушаішілік қоры сақталатын Кребс циклінде тотығу үдерістерінің белсенділенуі есебінен іске асырылады. Тиазот қышқылы молекуласының құрылымында тотығу-тотықсыздану қасиеттері тән күкірт тиолы, және сутегі иондарының артығымен байланысатын үшіншілікті азоттың болуы антиоксиданттық жүйенің белсенділенуін жүзеге асырады. Тиол тобының күшті тотықсыздандырғыш қасиеттері оттегінің белсенді түрлерімен және липидтік радикалдармен реакциясын туындатады. Антирадикальді ферменттердің – супероксиддисмутазаның, каталазаның және глутатионпероксидазаның реактивациясы оттегінің белсенді түрлерінің бастамалауына жол бермейді.
Тиазот қышқылының әсері миокардтың ишемияланған аймақтарында липидтердің тотығу үдерістерінің тежелуіне, миокардтың катехоламиндермен сезімталдығының азаюына, жүректің жиырылғыштық функциясының, тұрақтылықтың үдемелі бәсеңдеуін болдырмауға және соған сәйкес некроз аймағының және миокард ишемиясының азаюына әкеледі. Қанның реологиялық қасиеттері фибринолитикалық жүйенің белсенділенуі есебінен жүзеге асырылады. Миокард метаболизмі үдерістерінің жақсаруы, оның жиырылғыштық қабілетінің жоғарылауы, жүрек ырғағының қалыпқа келуіне қабілетті болуы тиазот қышқылын жүректің ишемиялық ауруының әр түрі бар науқастарды емдеу үшін ұсынуға мүмкіндік береді. Препаратты кардиологияда қолданумен қатар тиазот қышқылын, жоғары гепатопротекторлық қасиеттерін ескере отырып, бауырдың және басқа ішкі ағзалардың ауруларын емдегенде қолданады. Препарат гепатоциттердің ыдырауына жол бермейді, майдың инфильтрациялану дәрежесін және бауырдың орталық лобулярлық некроздарының жайылуын төмендетеді, гепатоциттердің репаративтік регенерациясы үдерістеріне мүмкіндік береді, оларда ақуыз, көмірсу, липид және пигмент алмасуларын қалыпқа келтіреді. Өттің синтезі және бөліну жылдамдығын арттырады, оның химиялық құрамын қалыпқа келтіреді.
Қолданылуы
Жүректің ишемиялық ауруын кешенді емдеуде:
- стенокардияда, миокард инфарктісінде, инфарктен кейінгі кардиосклерозда; жүрек аритмияларын емдеуде қосымша дәрі ретінде.
Созылмалы гепатитті, алкогольді гепатитті, фиброзды және бауыр циррозын кешенді емдеуде.
Қолдану тәсілі және дозалары
Миокард инфарктісінде және тұрақсыз стенокардияда Тиотриазолин®препаратын вена ішіне 4 мл 25 мг/мл ерітіндіні (100 мг) минутына 2 мл жылдамдықпен баяу немесе вена ішіне минутына 20-30 тамшы жылдамдықпен (4 мл 25 мг/мл ерітіндіні 150-250 мл 0,9% натрий хлориді ерітіндісінде сұйылтады) тамшылатып, немесе бұлшықет ішіне тәулігіне 2-3 рет 4 мл 25 мг/мл ерітіндіден (100 мг) енгізу керек. Емдеу курссы – 14 тәулік.
Кернеулі стенокардияда Тиотриазолин®препаратын бұлшықет ішіне тәулігіне 2 рет (тәуліктік доза - 200 мг) 4 мл 25 мг/мл ерітіндіден енгізу керек. Емдеу курсы – 14 күн.
Тыныш күйдегі стенокардияда және инфарктен кейінгі кардиосклерозда Тиотриазолин®препаратын бұлшықет ішіне тәулігіне 3 рет 2 мл 25 мг/мл ерітіндіден енгізу керек. Емдеу курсы – 20-30 күн.
Үдеріс белсенділігі айқын созылмалы гепатитте Тиотриазолин®препаратын алғашқы 5 күнде бұлшықет ішіне тәулігіне 2-3 рет 2 мл 25 мг/мл ерітіндіден (50 мг) немесе вена ішіне тәулігіне 1 рет 4 мл 25 мг/мл ерітіндіден (100 мг) минутына 2 мл жылдамдықпен баяу, немесе тамшылы түрде минутына 20-30 тамшы жылдамдықпен (2 ампула 25 мг/мл ерітіндіні 150-250 мл 0,9% натрий хлориді ерітіндісінде сұйылтады) енгізу керек. Емдеудің 5-ші күнінен бастап 20-шы күні Тиотриазолин® таблеткаларын (тәулігіне 3 рет 100 мг-ден) тағайындау керек.
Белсенділік дәрежесі аз және орташа созылмалы гепатитте Тиотриазолин®препаратын бұлшықет ішіне тәулігіне 3 рет 2 мл 25 мг/мл ерітіндіден енгізу керек. Емдеу курсы – 20-30 күн. Бауыр циррозында емдеу курсы – 60 күн. Емдеуді 5 күн бойы тәулігіне 3 рет 2 мл 25 мг/мл ерітіндіні (50 мг) бұлшықет ішіне енгізуден бастау керек, ал әрі қарай емдеуді таблеткалармен (тәулігіне 3 рет 100 мг-ден) жалғастыру керек.
Жағымсыз әсерлері
Препараттың жағымдылығы, әдеттегідей, жақсы. Жекелей жоғары сезімталдығы бар науқастарда мыналар пайда болуы мүмкін:
тері және теріасты шелі тарапынан: қышыну, тері гиперемиясы, бөртпе, есекжем жағдайлары;
иммундық жүйе тарапынан: басқа препараттарды қабылдау аясында ангионевроздық ісіну, анафилаксиялық шок жағдайлары сипатталған;
тағы басқалар: қызба, қалтырау жағдайлары және енгізген жерде өзгерулер.
Пациенттерде, көбіне егде жастағыларда басқа препараттарды қабылдаған кезде мыналар туындауы мүмкін:
орталық және шеткері жүйке жүйесі тарапынан: жалпы әлсіздік, бас айналу, құлақтың шуылдауы, бас ауыру;
жүрек-қантамыр жүйесі тарапынан: тахикардия, артериялық гипертензия, артериялық қысымның төмендеу жағдайлары;
асқазан-ішек жолы тарапынан: диспепсиялық құбылыстардың көрініс беруі, ауыздың кеберсуін, жүректің айнуын, іштің кебуін, құсуды қоса;
тыныс алу жүйесі тарапынан: ентігу және тұншығу
Қолдануға болмайтын жағдайлар
- тиазот қышқылына жоғары сезімталдық
- бүйрек функциясының жедел жеткіліксіздігі
- жүктілік және емшек емізу кезеңі
-18 жасқа дейінгі балалар мен жасөспірімдер
Дәрілермен өзара әрекеттесуі
Тиотриазолин® препаратын, кардиопротекторлық препарат ретінде, жүректің ишемиялық ауруын емдеу үшін негізгі дәрілермен біріктіріп қолдануға болады. Гепатопротекторлық дәрі ретінде, этиологиясы сәйкес келетін гепатиттердің дәстүрлі әдістерін тағайындаумен біріктірілуі мүмкін.
Айрықша нұсқаулар
Көлік құралын немесе потенциалды қауіпті механизмдерді басқару қабілетіне дәрілік заттың ықпал ету ерекшеліктері
Орталық және шеткері жүйке жүйесі тарапынан жағымсыз реакциялар пайда болған жағдайда автокөлікті басқарғанда және басқа да күрделі механизмдермен жұмыс жасағанда сақтық таныту қажет.
Артық дозалануы
Симптомдары:несепте натрий және калий концентрациясының жоғарылауы.
Емі: препарат қабылдауды тоқтату, симптоматикалық ем.
Шығарылу түрі және қаптамасы
Ампулада 2 мл-ден.Пішінді ұяшықты қаптамаға 10 ампуладан салынған. Пішінді ұяшықты 1 қаптама медициналық қолдану жөніндегі мемлекеттік және орыс тілдеріндегі нұсқаулықпен және ампулалық скарификатормен бірге қорапшаға салынған.
Сыйымдылығы 5 мл ампулада 4 мл-ден. Пішінді ұяшықты қаптамаға 5 ампуладан салынған. Пішінді ұяшықты 2 қаптама медициналық қолдану жөнінде мемлекеттік және орыс тілдеріндегі нұсқаулықпен және ампулалық скарификатормен бірге қорапшаға салынған.
Сақтау шарттары
Түпнұсқалық қаптамасында, 25°С-ден аспайтын температурада сақтау керек.
Балалардың қолы жетпейтін жерде сақтау керек.
Сақтау мерзімі
5 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы
Өндіруші
«Галичфарм»ЖАҚ
Украина, 79024, Львов қ., Опрышковская к-сі, 6/8
«Фарматрон» ҒӨБ ЖШҚ және «ДЗМҒО «тәжірибе зауыты» ЖШҚ әзірлеген, Харьков қ.
Тіркеу куәлігі иесінің атауы және елі
«Галичфарм» ЖАҚ, Украина.
Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері:
«Фармамед сауда үйі» ЖШС,
Aлматы қ., Ходжанов к-сі, 67 ғимарат, п.ж. 4а
Тел.: +7 (727) 344-99-05/06
E-mail: Almaty@pharmamed-arterium.kz
