Сипаттама
Дәрілік затты медициналық қолдану жөніндегі нұсқаулық
РИНОФЛУИМУЦИЛ
Саудалық атауы
Ринофлуимуцил
Халықаралық патенттелмеген атауы
Жоқ
Дәрілік түрі
Мұрын спрейі, 10 мл
Құрамы
100 мл ерітіндінің құрамында
белсенді заттар: 1 г ацетилцистеин,
0,5 г туаминогептан сульфаты,
қосымша заттар: бензалконий хлориді, гипромеллоза, динатрий эдетаты, натрий дигидрофосфатының моногидраты, натрий гидрофосфатының додекагидраты, дитиотреитол, сұйық сорбитол, жалбыз хош иістендіргіші, этанол96%, натрий гидроксиді, тазартылған су.
Сипаттамасы
Өзіне тән жалбыз иісі бар мөлдір, түссіз дерлік сұйықтық
Фармакотерапиялық тобы
Респираторлық жүйе. Деконгестанттар және жергілікті қолдануға арналған басқа мұрынға арналған препараттар. Басқа препараттармен біріктірілген симпатомиметиктер, кортикостероидтарды қоспағанда. Туаминогептан.
АТХ кодыR01AB08
Фармакологиялық қасиеттері
Фармакокинетикасы
Ұсынылған дозада мұрын ішіне қолданғанда препарат сіңірілмейді.
Фармакодинамикасы
Ринофлуимуцил муколитикалық және тамырды тарылтатын әсерлерге ие.
Ацетилцистеин белсенді сульфгидрильді топтың әсеріне негізделген муколитиктік белсенділікке ие, ол мукопротеиндердегі дисульфиддік байланыстарды ыдырата отырып, мұрын-жұтқыншақ бөліністерін сұйылтатын әсер береді.
Туаминогептан сульфаты – симпатомиметикалық амин, ол жергілікті қолданғанда айқын жүйелік әсерлерсіз тамырды тарылтатын әсер береді.
Қолданылуы
- бөлінуі қиын іріңді-шырышты қою секретпен жүретін жедел және жеделге жуық ринитте
- созылмалы ринит және мұрынның шырышты қабығында қабыршақтар түзілетін ринитте
- вазомоторлық ринитте
- синуситте
Қолдану тәсілі мен дозалары
Ересектерге:2 дозадан (клапанды 2 басу) әр мұрын жолына күніне 3-4 рет.
Балаларға: 1 дозадан (клапанды 1 басу) әр мұрын жолына күніне 3-4 рет.
Емдеу ұзақтығы 7 күннен аспауы тиіс.
Ұсынылған дозада асырмау керек.
Спрейді қолдану жөніндегі нұсқаулық
1. Ерітіндісі бар құтының қалпақшасын алып тастаңыз
2. Бүріккіштің қорғағыш қалпақшасын алып тастаңыз
3. Бүріккішті құтыға жалғаңыз
4. Бүріккіштің қақпағын алып тастаңыз
5. Бүріккішті қайта басып іске қосыңыз
Жағымсыз әсерлері
Препаратты жоғары дозада жиі қолдану симпатомиметикалық типті жағымсыз әсерлері дамуының себебі болуы мүмкін (жоғары қозғыштық, жүрек қағуының жиілеуі, тремор сияқты және т.б.). Кейде мұрын және тамақ шырышты қабығының құрғауы, безеу бөртпесі болуы мүмкін. Препарат қолдануды тоқтатқаннан кейін бұл әсерлері қайтады.
Көрсетілген жағымсыз реакциялары Ринофлуимуцил қолданумен байланысты болуы мүмкін; олардың туындау жиілігі белгісіз (қолда бар деректер негізінде бағалау мүмкін емес).
Жиілігі белгісіз:
- жоғары сезімталдық
- үрей, елестеулер, сандырақтау
- бас ауыруы, мазасыздық, қозу, ұйқысыздық, тремор
- жүректің қағуы, тахикардия, аритмия
- артериялық гипертензия
- мұрын қуысының және тамақтың құрғауы, мұрын қуысындағы жайсыздық, мұрынның бітелуі
- жүрек айнуы
- есекжем, тері бөртпесі
- несеп шығарудың іркілуі
- ашушаңдық, препараттың әсеріне төзімділік (дағдылану)
Қолдануға болмайтын жағдайлар
- препараттың қандай да бір компонентіне жоғары сезімталдық
- феохромоцитома
- жабық бұрышты глаукома
- басқа деконгенстанттарды қоса, мұрын ішіне қолданылатын басқа симпатомиметиктік дәрілерді бір мезгілде қолдану
- препаратты моноаминоксидаза (МАО) тежегіштерімен, соның ішінде қайтымды МАО тежегіштерімен емдеу кезінде және емдеу аяқталғаннан кейін 2 апта бойы қолданбау керек
- гипофиздің алынып тасталуы немесе мидың қатты қабығына жетумен жасалған операцияларды бастан өткеру
- гипертиреоз
- 12 жасқа дейінгі балаларға
Дәрілермен өзара әрекеттесулері
Туаминогептанның мұрын ішіне қолданғандағы жүйелік сіңу дәрежесінің төмендігіне қарамастан, төмендегі ықтимал өзара әрекеттесулерін назарда ұстау керек:
МАО тежегіштері, соның ішінде қайтымдылары – гипертензиялық криздің даму қаупін арттырады.
Гипертензияға қоса дәрілер (адренергиялық нейрондар блокаторларын және β-блокаторларды қоса) – гипотензиялық әсері төмендеуі мүмкін.
Жүрек гликозидтері – аритмияның даму қаупін арттыруы мүмкін.
Қастауыш алкалоидтары – эрготизм қаупін арттыруы мүмкін.
Паркинсон ауруына қарсы дәрілер – жүрек-қантамырлық уыттылығының қаупін арттыруы мүмкін.
Окситоцин – артериялық гипертензияның даму қаупін арттыруы мүмкін.
Айрықша нұсқаулар
Тек мұрын ішіне қолдануға арналған.
Мынадай ауруларда сақтықпен қолдану керек:
- тамырлардың окклюзиялық аурулары
- қант диабеті
- бронх демікпесі
- гипертиреоидизм
- қуық асты безі гипертрофиясы (несеп шығару кезінде қиналуды күшейтуі мүмкін)
- β-адреноблокаторларды қабылдау
- жүрек-қантамыр аурулары.
Жүрек-қантамыр аурулары кезінде (әсіресе артериялық гипертензияда) препаратты дәрігердің бақылауымен жүргізген жөн.
12 жастан кіші балаларға қолдануға болмайтын жағдайды ескер отырып, препарат егде адамдар мен балаларда сақтықпен қолданылуы тиіс.
Препаратты ұзақ қолдану препаратты тоқтатқаннан кейін мұрынның бітелуін және дәрі-дәрмектік ринитті туындатуы мүмкін.
Бірнеше күннің ішінде толық емдік әсері болмаған кезде дәрігермен кеңескен жөн; емдеудің ұзақтығы 7 күннен аспауы тиіс.
Дәрігердің шешімі бойынша препарат қолдануды тиісті бактерияға қарсы еммен үйлестіруге болады.
Туаминогептан сульфаты допинг-тестінің оң нәтижесін беруі мүмкін.
Бұл препарат офтальмологиялық қолдануға арналмаған.
Препарат құрамында бензалконий хлориді бар, ол тері реакцияларын немесе бронх түйілуін туындатуы ықтимал.
Жүктілік және лактация кезеңі
Препаратты жүктілік кезінде қолдану ұсынылмайды.
Лактация кезеңінде сәбиді емізуді тоқтату керек.
Автокөлікті немесе басқа механизмдерді басқару қабілетіне әсер ету ерекшеліктері
Деректер жоқ.
Артық дозалануы
Симптомдары: артериялық гипертензия, жарықтан қорқу, қатты бас ауыруы, кеуде қуысының қысылуы және сананың айқын бәсеңдеуімен (балаларда) гипотермия дамуы мүмкін.
Емі: симптоматикалық.
Шығарылу түрі және қаптамасы
10 мл препараттан күңгірт шыныдан жасалған, бүріккіш құрылғымен жабдықталған құтыларға құяды.
Құтыны медициналық қолдану жөніндегі мемлекеттік және орыс тіліндегі нұсқаулықпенбірге картон қорапшаға салады.
Сақтау шарттары
25 °С-ден аспайтын температурада сақтау керек.
Балалардың қолы жетпейтін жерде сақтау керек.
Сақтау мерзімі
2,5 жыл
Құтысын ашқаннан кейін ішіндегісін 20 күн бойы пайдалануға болады.
Жарамдылық мерзімі өткеннен кейін қолдануға болмайды.
Босатылу шарттары
Рецептісіз
Өндіруші
Замбон С.П.А.
Виа делла Кимика, 9,36100, Виченца, Италия
Тіркеу куәлігі иесінің атауы мен елі
Замбон С.П.А., Италия
Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электрондық пошта)
«ВИВА Фарм» ЖШС
2-ші Остроумов к-сі, 33, Алматы қ., ҚР
тел.: +7 (727) 383 74 63, факс: +7 (727) 383 74 56;
e-mail: pv@vivapharm.kz
