Ко-Амлесса 4 мг/5 мг/1,25 мг № 30 табл

Сипаттама

БЕКІТІЛГЕН Дәрілік препаратты медициналық қолдану жөніндегі нұсқаулық (Қосымша парақ)

Саудалық атауы

Ко-Амлесса

Халықаралық патенттелмеген атауы

Жоқ

Дәрілік түрі, дозасы

Таблеткалар, 2 мг/5 мг/0,625 мг, 4 мг/5 мг/1,25 мг, 4 мг/10 мг/1,25 мг, 8 мг/5 мг/2,5 мг және 8 мг/10 мг/2,5 мг

Фармакотерапиялық тобы

Жүрек-қантамыр жүйесі. Ренин-ангиотензин жүйесіне әсер ететін препараттар. Басқа препараттармен біріктірілген ангиотензин өзгертуші фермент (АӨФ) тежегіштері. АӨФ тежегіштері, басқа біріктірілімдері. Периндоприл, амлодипин және индапамид.

АТХ коды C09BX01

Қолданылуы

Ко-Амлесса жоғары артериялық қысымды (артериялық гипертензия) емдеу үшін тағайындалады. Барлық үш зат артериялық қысым көтерілуін (артериялық гипертензия) бақылауға көмектеседі.

Қолданудың басталуына дейінгі қажетті мәліметтер тізбесі

Қолдануға болмайтын жағдайлар

Ко-Амлессаны қабылдауға болмайды:

- егер Сізде периндоприлге немесе қандай да бір басқа АКФ тежегішіне, немесе индапамидке немесе қандай да бір басқа сульфаниламидтік препараттарға, амлодипин безилатына немесе қандай да бір басқа дигидропиридиндерге, немесе Ко-Амлесса препаратының қандай да бір басқа қосымша заттарына аллергия болса

- егер Сізде бауыр ауруының ауыр түрі немесе бауыр энцефалопатиясы деп аталатын ауру (мидың дегенеративті ауруы) болса

- егер Сізде бүйрек ауруының ауыр түрі болса немесе диализ алып жүрсеңіз. Ко-Амлесса 8 мг/5 мг/2,5 мг және Ко-Амлесса 8 мг/10 мг/2,5 мг бүйрек ауруының ауыр және орташа түрлерінде қарсы көрсетілімді

- егер Сізде қандағы калий деңгейі төмен немесе жоғары болса

- егер Сізде декомпенсацияланған жүрек жеткіліксіздігінің (организмдегі айқын сұйықтық іркілісі, тыныс тарылуы) жазылмағанына күмән болса

- егер Сізде кардиогенді шок (жүректің организмді қанмен жеткілікті шамада қамтамасыз ете алмайтын жағдайы), қолқа клапаны стенозы (жүректен шығатын негізгі қан тамырларының тарылуы)

- егер Сізде төмен артериялық қысымның ауыр түрі (ауыр артериялық гипотензия) болса

- егер Сіз жүректің жедел ұстамасы салдарынан болатын жүрек жеткіліксіздігінен зардап шексеңіз (жүректің бүкіл денедегі қанды айдау жағдайының талапқа сай болмауы, бұл ентігуге немесе аяқ, жіліншік немесе табан ісінуі сияқты шеткері ісінулерге алып келеді)

- егер Сізде қант диабеті немесе бүйрек функциясының бұзылуы болса және Сіз құрамында алискирен бар артериялық қысымды төмендететін препараттарды қабылдап жүрсеңіз

- егер Сізде бүйрек кінәраттары болып, бүйректің қанмен қамтылуы төмендеп кетсе (бүйрек артерияларының стенозы)

- егер Сіз жүрек жеткіліксіздігі кезіндегі препарат - сакубитрил/валсартанмен ем алып жүрсеңіз

- балалар мен 18 жасқа дейінгі жасөспірімдерге

- егер Сізде жүктілік мерзімі 3 айдан асып кетсе (сондай-ақ, Ко-Aмлесса жүктіліктің ерте мерзімдерінде қабылдауға ұсынылмайды - «Жүктілік және бала емізуден» қараңыз),

- егер Сіз бала емізіп жүрсеңіз.

Қолдану кезіндегі қажетті сақтандыру шаралары

Ко-Aмлесса қабылдауды бастамас бұрын өз емдеуші дәрігеріңізбен немесе фармацевтпен кеңесіңіз:

- егер Сізде жүрек ұстамасы таяуда болса

- егер Сізде қолқа клапаны стенозы (жүректен шығатын негізгі қан тамырының тарылуы) немесе гипертрофиялық кардиомиопатия (жүрек бұлшықетінің ауруы) немесе бүйрек артериясының стенозы (бүйректі қанмен қамтитын артерияның тарылуы) болса

- егер Сізде жүрек жеткіліксіздігі болса

- егер Сізде жүректің немесе бүйректің басқа кінәраттары болса

- егер Сізде шектен тыс жоғары артериялық қысым болса (гипертониялық криз)

- егер Сізде бауыр кінәраттары болса

- егер Сіз жүйелі қызыл жегі немесе склеродермия сияқты коллагендік аурулардан (тері ауруларынан) зардап шегіп жүрсеңіз

- егер Сізде атеросклероз (артериосклероз) болса

- егер Сіз гиперпаратиреоздан (аса жоғары белсенді қалқанша маңы безі) зардап шегіп жүрсеңіз

- егер Сіз подаградан зардап шексеңіз

- егер Сізде қант диабеті болса

- егер Сіз тұз мөлшері шектеулі диета ұстанып немесе құрамында калий бар тұз алмастырғыштарды пайдаланып жүрсеңіз

- егер Сіз литий препараттарын немесе калий жинақтаушы диуретиктер (спиронолактон, триамтерен) қабылдап жүрсеңіз, өйткені оларды Ко-Aмлесса препаратымен пайдаланудан сақтану керек,

- егер Сіз егде жастағы пациенттер тобына жатсаңыз және Сізге дозаны арттыру қажет болса.

Ко-Aмлесса препаратын қабылдау кезінде Сіз сондай-ақ өз емдеуші дәрігеріңізге немесе медициналық персоналға хабарлауыңыз қажет:

- егер Сізге операция жасалатын болса

- егер Сізге анестезия және / немесе операция жасалатын болса

- егер Сізде таяуда диарея немесе құсу байқалса, немесе сусыздану болса

- егер Сізге диализ немесе ТТЛП аферезі (яғни, аппарат көмегімен қаннан холестеринді шығару) жасалатын болса

- егер Сіз аралардың немесе соналардың шағып алуынан аллергия зардаптарын азайту үшін десенсибилизация курсынан өтуге жиналып жүрсеңіз

- егер Сіз құрамында йод бар контрастылы зат (бүйрек немесе асқазан сияқты ағзалардың рентгенограммадан көрінуіне ықпал ететін зат) инъекциясын талап ететін медициналық тексеруден өткіңіз келсе.

Спортсмендер Ко-Амлесса препаратының құрамында допинг-тестілерде оң реакция беруі мүмкін белсенді ингредиент (индапамид) бар екенін білу қажет.

Басқа дәрілік препараттармен өзара әрекеттесуі

Егер сіз қандай да бір басқа дәрілік затты қабылдап жүрсеңіз, таяуда қабылдасаңыз немесе қабылдауды жоспарласаңыз, өз дәрігеріңізге немесе фармацевтке хабарлаңыз.

Ко-Амлесса препаратын мыналармен қабылдаудан сақтану керек:

- литий препараттарымен (депрессияны емдеу кезінде пайдаланылған)

- организмде калий деңгейін арттыруы мүмкін калий жинақтаушы диуретиктермен (спиронолактон, триамтерен), калий тұздарымен, басқа препараттармен (гепарин және триметоприм/сульфаметоксазол ретінде де белгілі ко-тримоксазол сияқты).

Ко-Амлесса препаратымен емдеуге басқа дәрілік заттар ықпал етуі мүмкін.

Егер сіз келесі дәрілік заттардың қандай да бірін қабылдап жүрсеңіз, міндетті түрде өз дәрігеріңізге хабарлаңыз, өйткені ерекше емдеу қажет болуы мүмкін:

- жоғары артериялық қысымды емдеуге арналған басқа дәрілік заттар, ангиотензин II рецепторларының блокаторларын (АРБ), алискирен немесе диуретиктерді (бүйрекпен бөлінетін несеп көлемін арттыратын препараттарды) қоса

- прокаинамид (жүрек аритмиясын емдеу үшін)

- аллопуринол (подаграны емдеу үшін)

- терфенадин немесе астемизол (пішен қызбасы немесе аллергия кезіндегі антигистаминдік препараттар)

- ауыр демікпені және ревматоидты артритті қоса, әртүрлі жай-күйлерді емдеу үшін пайдаланылатын кортикостероидтар

- аутоиммундық бұзылыстарды емдеуге немесе трансплантация жасалатын операциядан кейін қабылданбай ажырауды болдырмау үшін пайдаланылатын иммунодепрессанттар (мысалы, циклоспорин)

- ритонавир, индинавир, нелфинавир (АИТВ емдеуге пайдаланылатын протеаза тежегіштері деп аталатын)

- обырды емдеуге арналған дәрілік заттар

- кетоконазол, итраконазол (зеңге қарсы препараттар)

- рифампицин, эритромицин, кларитромицин (антибиотиктер)

- галофантрин (безгектің белгілі бір түрлерін емдеуге қолданылатын)

- пентамидин (пневмонияны емдеуге қолданылады)

- инъекциялық алтын препараттары (ревматоидты полиартритті емдеуге қолданылады)

- винкамин (егде жастағы адамдарда, жадыны жоғалтуды қоса, симптоматикалық когнитивтік бұзылыстарды емдеуге қолданылады)

- бепридил, верапамил, дилтиазем (жүрек препараттары)

- султроприд (психоздарды емдеу үшін)

- жүрек ырғағының кінәраттарын емдеуге қолданылатын дәрілік заттар (мысалы, хинидин, гидрохинидин, дизопирамид, амиодарон, соталол)

- дигоксин немесе басқа жүрек гликозидтері (жүрек ауруларын емдеуге арналған)

- баклофен (жайылған склероз сияқты аурулар тұсында туындайтын бұлшықеттер сіресуін емдеуге арналған)

- инсулин немесе метформин сияқты қант диабетін емдеуге арналған дәрілік заттар

- кальций, кальций қоспаларын қоса

- көтермелеуші іш жүргізгіш дәрілер (мысалы, сенна)

- қабынуға қарсы стероидты емес дәрілік заттар (мысалы, ибупрофен) немесе жоғары дозалардағы салицилаттар (мысалы, ацетилсалицил қышқылы)

- инъекцияға арналған амфотерицин В (ауыр зең ауруларын емдеуге арналған)

- депрессия, мазасыздық, шизофрения сияқты психикалық бұзылыстарды емдеуге арналған дәрілік заттар (мысалы, трициклды антидепрессанттар, нейролептиктер)

- тетракозактид (Крон ауруын емдеуге арналған)

- Hypericum perforatum (кәдімгі шайқурай)

- дантролен (дене температурасының ауыр бұзылулары кезіндегі инфузия)

- такролимус (иммундық жүйе жұмысын өзгерту үшін қолданылатын дәрілік зат)

- симвастатин (холестерин деңгейін төмендетуге арналған препарат)

- циклоспорин (иммунодепрессант)

- анестетиктер.

Ко-Амлесса препаратын тамақпен және сұйықтықпен қабылдау

Ко-Амлессаны тамақтың алдында қабылдаған дұрыс.

Грейпфрут шырыны және грейпфрут Ко-Амлесса қабылдайтын адамдарда ішуге болмайды. Бұл грейпфрут және грейпфрут шырыны қандағы амлодипин белсенді компоненті деңгейінің артуына әкелуі мүмкін, бұл Ко-Амлесса препаратының қысымды төмендететін әсерінің болжанбайтын жоғарылауын туғызуы мүмкін.

Егер Сізде көру қабілетінің төмендеуі немесе көзде ауырсынуы пайда болса, ол көздің тамырлы қабатында сұйықтықтың жиналу симптомы (хориоидты жалқық) немесе көзішілік қысымның артуы пайда болуы мүмкін, бұл әдетте Ко-Амлессаны қабылдау басталған сәттен бастап бірнеше сағаттан аптаға дейін байқалады. Бұл емделмеген кезде қайтымсыз көру қабілетінің жоғалуына әкелуі мүмкін. Егер Сізде бұрын сульфонамидке немесе пенициллинге аллергиялық реакциялар болса, бұл аурудың даму қаупі жоғары.

Арнайы сақтандырулар

Қосымша заттар туралы айрықша сақтандырулар

Натрий

Бұл дәрілік зат құрамында таблеткасына 1 ммоль-ден аз натрий (23 мг) бар, яғни, құрамында натрий мүлде жоқ.

Педиатрияда қолдану

Ко-Амлесса балалар мен 18 жасқа дейінгі жасөспірімдерде қолдануға ұсынылмайды.

Жүктілік және бала емізу

Егер Сіз жүкті болсаңыз немесе бала емізіп жүрсеңіз, сондай-ақ жүкті екеніңізге күмән болса немесе жүктілікті жоспарласаңыз, осы препаратты қабылдар алдында өз емдеуші дәрігеріңізбен немесе фармацевтпен кеңесіңіз.

Жүктілік немесе лактация кезінде

Еге Сіз өзіңізді жүкті деп санасаңыз (немесе жүктілікті жоспарласаңыз), сіз бұл жөнінде өз емдеуші дәрігеріңізге хабарлауыңыз қажет.

Сіздің дәрігеріңіз, әдетте, Сізге Ко-Амлесса препаратын өзіңіз жүкті болатын сәтке дейін немесе жүкті екеніңізді білген бойда тоқтатуды ұсынады және сізге Ко-Амлесса орнына басқа препаратты қабылдауға кеңес береді. Ко-Амлессаны жүктіліктің ерте мерзімдерінде қабылдауға кеңес берілмейді және, егер сіздің жүктілік мерзіміңіз 3 айдан асып кетсе, оны қабылдауға болмайды, өйткені жүктіліктің үшінші айынан кейін препаратты қабылдау сіздің сәбиіңізге салмақты зиян тигізуі мүмкін.

Амлодипиннің аздаған мөлшерде емшек сүтіне өтетіні көрсетілген.

Егер Сіз бала емізіп жүрсеңіз немесе емшек емізу жоспарыңызда болса, бұл жөнінде өз дәрігеріңізді дереу хабардар етіңіз. Ко-Амлесса емшекпен қоректендіру кезінде қарсы көрсетілімді, ал егер бала емізгіңіз келсе, әсіресе, егер Сіздің сәбиңіз жаңа туған нәресте болса немесе шала туылса, Сіздің дәрігеріңіз Сіз үшін басқа емдеу түрін таңдай алады. Осындай жағдайларда емдеуші дәрігерге қаралу керек.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Ко-Амлесса препаратының автокөлікті жүргізу және механизмдерді басқару қабілетіне әсер етуіне зерттеулер жүргізілмеген. Ко-Амлесса препаратының Сізге қалай әсер ететінін біліп алғанша көлік құралын немесе аса қауіпті механизмдерді басқаруға кеңес берілмейді.

Қолдану жөніндегі нұсқаулар:

Дозалау режимі

Аталған препаратты үнемі өз дәрігеріңіз немесе фармацевт Сізге тағайындағандай дәлдікте қабылдаңыз. Егер Сізде препаратты дұрыс қабылдағаныңызға күмән болса, өз емдеуші дәрігеріңізбен немесе фармацевтпен кеңесіңіз.

Ұсынылатын доза күніне бір рет бір таблетка құрайды. Таблетканы таңертең және ас ішу алдында қабылдаған дұрыс. Таблетканы бір стақан сумен іше отырып, жұтыңыз.

Сіздің емдеуші дәрігеріңіз Сіз үшін дұрыс дозаны таңдап алады. Ко-Aмлeсса жекелеген препараттар түрінде периндоприл, индапамид және амлодипин қабылдап жүрген пациенттерге тағайындалады.

Енгізу әдісі және жолы

Ішке қабылдауға арналған.

Қабылдау уақытының көрсетілуімен қолдану жиілігі

Ұсынылатын доза күніне бір рет бір таблетка құрайды. Таблетканы таңертең және ас ішу алдында қабылдаған дұрыс. Таблетканы бір стақан сумен іше отырып, жұтыңыз.

Артық дозалану жағдайында қабылдау қажет болатын шаралар

Егер Сіз тым көп таблетка қабылдап қойсаңыз, дереу өз дәрігеріңізге немесе жақын маңдағы жедел жәрдем бөлімшесіне қаралыңыз. Артық дозалану жағдайындағы ең ықтималды әсер артериялық қысымның төмендеуі болып табылады. Егер артериялық қысымның айқын төмендеуі білінсе (бас айналу немесе естен тану сияқты симптомдар), жатып, аяқты көтеру керек, бұл сіздің жай-күйіңізді жеңілдетуі мүмкін.

Дәрілік препараттың бір немесе бірнеше дозасын өткізіп алу кезіндегі қажетті шаралар

Препаратты күн сайын қабылдау маңызды, өйткені қабылдау жиілігі емдеудің өте тиімді болуына ықпал етеді. Дегенмен де, егер Сіз Ко-Амлесса дозасын қабылдауды ұмытсаңыз, келесі дозаны әдеттегі уақытта қабылдаңыз. Өткізіп алған таблетка орнын толтыру үшін келесі дозаны екі еселеуге болмайды.

Тоқтату симптомдары қаупінің болуына көрсетілім

Жоғары артериялық қысымды емдеу әдетте өмір бойы жалғасатындықтан, осы дәрілік затты қабылдауды тоқтатпас бұрын өз дәрігеріңізбен кеңесу керек.

Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі кеңестер

Егер Сізде осы дәрілік затты қолдануға қатысты қандай да бір қосымша сұрақтар туындаса, өз дәрігеріңізбен немесе фармацевтпен кеңесіңіз.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар.

Еге Сіз өзіңізді жүкті деп санасаңыз (немесе жүкті болуды жоспарласаңыз), Сізге бұл жөнінде өз емдеуші дәрігеріңізге хабарлау қажет. Ко-Амлессаны жүктіліктің ерте мерзімдерінде қабылдауға кеңес берілмейді, егер жүктілік мерзімі 3 айдан асып кетсе, оны қабылдауға болмайды, өйткені осы сатыда препаратты қабылдау сәбиге салмақты зиян тигізуі мүмкін. («Жүктілік және бала емізуден» қараңыз).

Барлық дәрілік заттар сияқты, аталған препарат олар әркімде көрініс бермесе де жағымсыз әсерлер туғызуы мүмкін.

Егер Сізде келесі жағымсыз әсерлердің біреуі байқалса, осы дәрілік препаратты дереу тоқтатыңыз және өз дәрігеріңізбен байланысыңыз:

- кенеттен ысқырып демалу, кеуде қуысының ауыруы, ентігу немесе тыныс тарылуы,

- бет, ерін, ауыз, тіл немесе тамақ ісінуі сияқты аллергиялық реакция симптомдары, тыныс тарылуы,

- ауыр тері реакциялары, қатты тері бөртпесін, есекжемді, бүкіл дене терісінің қызаруын, қатты қышынуды, сулы бөртпенің түзілуін, терінің қабыршақтануы мен ісінуге бейімділігін, шырышты қабықтардың қабынуын қоса (Стивенс-Джонсон синдромы, уытты эпидермалық некролиз) немесе басқа аллергиялық реакциялар,

- қатты бас айналу немесе естен тану,

- жүрек ұстамасы, жүректің әдеттен тыс тез немесе ырғақсыз соғуы,

- өте нашар хал-ахуалмен қатар жүретін іштің және арқаның қатты ауыруын туғызуы мүмкін ұйқы безінің қабынуы.

Өте жиі

- ісіну (сұйықтық іркілісі)

Жиі

- бас ауыру, бас айналу сезімі, вертиго

- шаншу, ұйқышылдық (қалғып-мүлгу)

- көру қабілетінің бұзылуы (көзге қос көрінуді қоса)

- төмен артериялық қысым салдарынан болатын бас айналу

- тиннит (құлақтағы шуылды сезіну)

- төмен артериялық қысым, жүректің жиі соғуы (жүректің өте тез соғуы)

- гиперемия (ысынуды сезіну немесе беттің ысып кетуі)

- ентігу, жөтел

- асқазан-ішек жолы тарапынан болатын бұзылулар (жүрек айну, эпигастрий ауыруы, анорексия, құсу, іштің ауыруы, дәм сезу түйсіктерінің бұрмалануы, ауыздың құрғауы, ішектің босатылу ырғағының өзгеруі, диспепсия немесе ас қорыту кінәраттары, диарея, іш қату)

- бұлшықеттердің түйілуі

- жіліншіктің ісінуі

- әлсіздік, шаршау сезімі

Жиі емес

- аллергиялық реакциялар (тері бөртпесі, қышыну сияқты)

- көңіл-күйдің құбылуы

- ұйқының бұзылуы, ұйқысыздық

- депрессия

- діріл

- ауыру түйсіктерін жоғалту

- жүректің ырғақсыз соғуы

- естен тану (уақытша санадан айрылу)

- ринит (мұрынның бітелуі немесе тұмаурату)

- бронх түйілуі (кеуденің қысылуы, ысқырып демалу және ентігу)

- ангионевроздық ісіну (ысқырып демалу, бет немесе тілдің ісінуі сияқты симптомдар)

- есекжем, пурпура (терідегі қызыл нүктелер)

- тершеңдік

- шаштың түсуі

- терідегі қызыл немесе түссізденген дақтар

- арқаның, бұлшықеттердің немесе буындардың ауыруы

- бүйрек кінәраттары, несеп шығару қажеттілігінің артуы, әсіресе, түнде

- белсіздік, ерлерде кеуденің үлкеюі, кеуденің ауыруы,

- ауыру

- жалпы дімкәстануды сезіну

- салмақтың артуы немесе азаюы

Сирек

- сананың шатасуы

- псориаз өршуі

Өте сирек

- лейкоциттер санының азаюы, әдеттен тыс қанталауға немесе сәл қан кетуге әкелуі мүмкін қандағы тромбоциттер санының азаюы

- қандағы жоғары қант деңгейі

- жүрек-қантамыр бұзылулары (стенокардия, жүрек ұстамасы)

- эозинофилиялық пневмония (пневмонияның сирек типі)

- қызылиектер ісінуі

- іштің кебуі (гастрит)

- шеткері невропатия (түйсіктер жоғалуын туғызатын ауру, ауыру, бұлшықеттерді бақылау қабілетсіздігі), бұлшықеттің қатты ширығуы

- мультиформалы эритема сияқты ауыр тері көріністері. Егер Сізде жүйелі қызыл жегі (коллагенді ауру типі) болса, ауру нашарлап кетуі мүмкін

- бауыр функциясының бұзылуы, бауыр қабынуы (гепатит), терінің сарғаюы (сарғаю), бауыр ферменттері деңгейінің жоғарылауы, бұл кейбір медициналық тестілерге әсер етуі мүмкін

- тері бөртпесімен жиі қатар жүретін қан тамырларының қабынуы.

- Күннің немесе жасанды ультракүлгін сәулелердің әсерінен кейін фотосезімталдық реакциялар жағдайлары да (терінің сыртқы түр өзгерістері) хабарланды

Айрықша сирек / жекелеген жағдайларда және т.б.

- өмірге қауіпті жүрек аритмиясы (Torsade de pointes)

- қан, бүйрек, бауыр немесе қалқанша без тарапынан бұзылулар және зертханалық көрсеткіштердің өзгерістері (қан талдаулары) туындауы мүмкін.

- Сізге өз дәрігеріңіз Сіздің жай-күйіңізді тексеру мақсатында қан талдауын жасауды тағайындай алады.

- бауыр жеткіліксіздігі жағдайларында (бауыр кінәраттары) бауыр энцефалопатиясының туындау ықтималдығы (мидың дегенеративтік ауруы) болады.

- дірілдеу, тік қалыпты сымбат, маска тәрізді бет, баяу қимылдау және тарпылдаған жүріс-тұрыс, орнықсыз жүріп-тұру, Рейно феномені.

- қысымның жоғарылауымен байланысты көру қабілетінің төмендеуі немесе көздегі ауырсыну (көздің тамырлы қабатында сұйықтықтың жиналу белгілері болуы мүмкін (хориоидты жалқық) немесе жедел жабықбұрышты глаукома)

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық деректер базасына тікелей хабарласу керек

Қазақстан Республикасы Денсаулық сақтау министрлігі Медициналық және фармацевтикалықбақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препарат құрамы

Бір таблетканың құрамында

белсенді заттар:

қосымша заттар: микрокристалды целлюлоза 102 тип, микрокристалды целлюлоза 112 тип, желатинденген крахмал 1500 тип, натрий крахмалы гликоляты, кальций хлориді гексагидраты, натрий гидрокарбонаты, сулы коллоидты кремнийдің қостотығы, магний стеараты

Сыртқы түрінің, иісінің, дәмінің сипаттамасы

Сопақша пішінді, екі беті дөңес, бір жағында сызығы бар, ұзындығы 9 мм ақтан ақ дерлік түске дейінгі таблеткалар (2 мг/5 мг/0,625 мг доза үшін).

Дөңгелек пішінді, екі беті сәл дөңес, ойығы бар, диаметрі 7 мм ақтан

ақ дерлік түске дейінгі таблеткалар (4 мг/5 мг/1,25 мг доза үшін).

Сопақша пішінді, екі беті дөңес, бір жағында сызығы бар, ұзындығы 12 мм ақтан ақ дерлік түске дейінгі таблеткалар (4 мг/10 мг/1,25 мг доза үшін).

Дөңгелек пішінді, екі беті дөңес, ойығы бар, диаметрі 9 мм

ақтан ақ дерлік түске дейінгі таблеткалар (8 мг/5 мг/2,5 мг доза үшін).

Дөңгелек пішінді, екі беті дөңес, бір жағында сызығы, ойығы бар диаметрі 9 мм ақтан ақ дерлік түске дейінгі таблеткалар (8 мг/10 мг/2,5 мг доза үшін).

Шығарылу түрі және қаптамасы

Ламинацияланған полиамидті/алюминий/поливинилхлоридті үлбірден және алюминий фольгадан жасалған пішінді ұяшықты қаптамаға 10 таблеткадан салады.

Медициналық қолдану жөніндегі мемлекеттік және орыс тілдеріндегі нұсқаулықпен бірге пішінді ұяшықты 3, 6 немесе 9 қаптамадан картон қорапшаға салынады.

Сақтау мерзімі

2 жыл.

Жарамдылық мерзімі өткеннен кейін қолдануға болмайды!

Сақтау шарттары

Түпнұсқалық қаптамасында, 25 °С-ден аспайтын температурада сақтау керек.

Балалардың қолы жетпейтін жерде сақтау керек!

Дәріханалардан босатылу шарттары

Рецепт арқылы

Өндіруші туралы мәліметтер

КРКА, д.д., Ново место,

Шмарьешка цеста 6, 8501 Ново место, Словения

Тіркеу куәлігінің ұстаушысы

КРКА, д.д., Ново место,

Шмарьешка цеста 6, 8501 Ново место, Словения

тел.: +386 7 331 21 11

факс: +386 7 332 15 37

info@krka.biz

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«КРКА Қазақстан» ЖШС

Қазақстан Республикасы, 050059, Алматы қ., Әл Фараби д-лы 19,

«Нұрлы Тау» БО, 1Б корпусы, 207 кеңсе

тел.: +7 (727) 311 08 09

факс: +7 (727) 311 08 12

info.kz@krka.biz

Қалалар