Флунол 25 мг/5 мл 70 мл сироп

Сипаттама

Дәрілік затты медициналық қолдану

жөніндегі нұсқаулық

ФЛУНОЛ^®

Препараттың саудалық атауы

Флунол^®

Халықаралық патенттелмеген атауы

Флуконазол

Дәрілік түрі

25 мг/5 мл шәрбат, 70 мл

Құрамы

бір құтының ішінде

белсенді зат – 350 мг флуконазол,

қосымша заттар – сахароза, лимон қышқылы моногидраты, натрий цитраты дигидраты, глицерин, метилпарабен, пропилпарабен, апельсин хош иістендіргіші, тазартылған су.

Сипаттамасы

Апельсин дәмді мөлдір түссіз шәрбат.

Фармакотерапиялық тобы

Жүйелі қолдануға арналған микробқа қарсы препараттар.

Жүйелі қолдануға арналған зеңге қарсы препараттар. Триазол туындылары. Флуконазол.

АТХ коды J02АC01

Фармакологиялық қасиеттері

Фармакокинетикасы

Ішке қабылданғаннан кейін флуконазол асқазан-ішек жолынан жақсы сіңеді, тамақ ішу оның сіңуіне ықпалын тигізбейді. Биожетімділігі 90% құрайды. Қабылдағаннан кейін 0,5-1,5 сағаттан соң қан плазмасында ең жоғары концентрацияға жетеді. Қан плазмасы ақуыздарымен байланысу дәрежесі әлсіз (11-12%). Емдеуді бастағаннан кейін 4-5 апта ішінде қан плазмасындағы флуконазол тепе-тең 90% концентрацияға жетеді. Флуконазол организмнің тіндеріне, сұйықтығына, емшек сүтіне, плаценталық және гематоэнцефалдық бөгет арқылы жақсы өтеді. Флуконазолдың көп бөлігі бүйрек арқылы шығарылады, қабылданған дозаның 80%-ға жуығы өзгермеген күйінде несеппен бірге бөлініп шығады. Жартылай шығарылу кезеңі 25 сағатқа жуық.

Шала туған балалар үшін флуконазолға жүргізілген осындай зерттеулер шектеулі.

Фармакодинамикасы

Флуконазол – зеңге қарсы триазол класының өкілі, Р450 цитохромының зеңдік ферментінің селективті тежегіші болып табылады, зеңдердің жасушаларында стеролдардың синтезін бөгейді, жасушалық жарғақшалардың өткізгіштігін арттырады, оның өсуін және репликациясын бұзады. Препарат оппортунистік микоздарда, соның ішінде Candida spp., Cryptococcus neoformans, Microsporum spp., Trichophyton spp. әсерінен туындаған микоздарда тиімді. Сондай-ақ Blastomyces dermatitidis, Coccidiodes immitis және Histoplasma capsulatu туыстас зеңдерге қатысты да тиімді.

Қолданылуы

- криптококктік менингитті және басқа жерлерге (өкпе, тері) орналасқан инфекцияларды қамтитын криптококкозда;

- жүйелік кандидозда;

- шырышты қабықтардың кандидозында, орофарингеальді кандидозды, өңеш кандидозын және ауыз қуысының созылмалы атрофиялық кандидозын (тіс протездерінен туындаған қабыну) қоса;

- әр жерде орналасқан тері микоздары, оның ішінде кебек тәрізді теміреткі, трихофития

- ЖИТС-ке шалдыққан науқастарда ауыз қуысы және жұтқыншақ кандидозының қайталануына қатысты профилактика жүргізу үшін;

- қатерлі жаңа түзілімдері бар және цитоуыттық химиотерапия немесе сәулелік терапия нәтижесінде инфекциялану қаупі бар пациенттерде зеңдік инфекцияларға қарсы профилактика жүргізу үшін;

- әсер ету ауқымы кең антибиотиктерді қолданған кезде зеңдік инфекцияларға қарсы профилактика жүргізу үшін.

Ем бактериологиялық және басқа да зертханалық зерттеу нәтижелері алынғанға дейін тағайындалуы мүмкін; алайда, бұл нәтижелердің дайын екені белгілі болған кезде, алынған нәтижелерге қарай инфекцияларға қарсы емді түзеткен жөн.

Қолдану тәсілі және дозалары

Флунол® препаратының шәрбаты ішке қабылдауға арналған.

Препараттың тәуліктік дозасы және дозалау режимі зеңдік инфекцияның түріне және ауырлық дәрежесіне қарай есептеледі. Емдеу талдаудың оң нәтижелері немесе клиникалық параметрлері алынғанға дейін жалғастырылуы тиіс. Емдеудің жеткіліксіз ұзақтығы белсенді инфекцияның қайталануына әкелуі мүмкін.

Ересектер:

Криптококкозды емдеу үшін Флунол® препаратын күніне 1 рет 400 мг дозада (5 мг/кг жуық) қолдану ұсынылған. Емдеудің орташа ұзақтығы – 6 - 8 апта. Аурудың қайталануын дер кезінде диагностикалау үшін 1 жыл бойы пациенттің жай-күйін бақылау қажет. Иммунитеті әлсіреген пациенттерде криптококктікинфекцияның қайталануына жол бермеу мақсатында Флунол® шәрбатын тәулігіне 1 рет 200 мг (2,5 мг/кг жуық) дозада тағайындайды. АИТВ-оң пациенттерге, сондай-ақ ЖИТС-пен ауыратындарға өмір бойы ем жүргізу ұсынылады.

Криптококктік менингитті емдеу үшін Флунол® препаратын емдеудің алғашқы күні бір реттік 400 мг (около 5 мг/кг) дозада, содан кейін тәулігіне бір реттік 200 - 400 мг қолдану ұсынылады. Емдеудің орташа ұзақтығы жұлын-ми сұйықтығы өсіріндісінен теріс нәтижелер алынғаннан кейін 10-12 аптаны құрайды. Аурудың қайталануын дер кезінде диагностикалау үшін 1 жыл бойы пациенттің жағдайын бақылау қажет. ЖИТС-пен ауыратындарға шектеусіз кезең ішінде криптококктік менингиттің қайталануына жол бермеу үшін негізгі емдеу курсын аяқтағаннан кейін күніне 1 рет 200 мг Флунол® препаратын қабылдау ұсынылады.

Орофарингеальді кандидоз жағдайында емдеудің алғашқы күні 2 апта бойы күніне 1 рет 200 мг (2,5 мг/кг жуық) және кейінгі күндері 100 мг (1,25 мг/кг жуық) қабылдау ұсынылады. Иммунитеті төмендеген пациенттерге аурудың қайталануының дамуына жол бермеу үшін ұзақ уақыт күн сайын тәулігіне бір рет 100 - 200 мг доза Флунол® препаратын профилактикалық қолдану ұсынылады. Ауыз қуысының атрофиялық кандидозында Флунол® препаратының ұсынылатын дозасы 14 күн бойы күніне 1 рет 50 мг құрайды, сонымен қатар бір мезгілде ауыз қуысын жергілікті әсер ететін антисептикалық препараттармен өңдеген жөн.

Өңештің кандидозында тиімді доза 14 күн бойы күніне 1 рет 100 мг Флунол® препаратын құрайды. Қажет болған жағдайда Флунол® препаратының тәуліктік дозасын 400 мг-ге дейін арттыруға болады. Өңеш кандидозын емдеудің орташа ұзақтығы 3 аптаға жуықты және аурудың клиникалық симптомдары жоғалғаннан кейін ең кемінде 2 аптаны құрайды.

Тіс протездерін киюмен байланысты атрофиялық пероральді кандидозда – 14 күн бойы тәулігіне 1 рет 50 мг дозаны протезді өңдеуге арналған жергілікті антисептикалық ДЗ-бен біріктіріп қолданады.

Қатерлі жаңа түзілімдері бар және цитоуыттық химиотерапия немесе сәулелік терапия нәтижесінде инфекциялану қаупі жоғары пациенттерде зеңдік инфекцияның дамуына жекелей бейімділігіне қарай кандидоздың профилактикасы үшін – шектеусіз кезең ішінде күніне 1 рет 50-ден 400 мг-ге дейін.

Кандидоздың дамуына жол бермеу мақсатында әсер ету ауқымы кең антибиотиктерді қолданғанда 150 мг доза Флунол® препаратын антибиотикті қабылдаудың соңғы күні профилактикалық бір реттік қолдану ұсынылады.

Жүйелік ауруларға жоғары қаупі бар, мысалы, нейтропенияның ауыр немесе созылмалы түрлеріне бейім науқастарға күніне 400 мг препараттан қабылдау ұсынылады. Флунол® қабылдауды нейтропенияның болжамды дебютінен бірнеше күн бұрын бастаған және нейтрофилдер саны 1,0 x 10⁹/л (= мм³-де 1000 жасуша) дейін өскеннен кейін 7 күн бойы жалғастырған жөн.

Балалар:

Емдеу ұзақтығы, ересек пациенттердегідей, клиникалық және микоздық көрінісіне байланысты. Криптококктік менингитті емдеу үшін алғашқы күні Флунол® препаратының дозасы тәулігіне бір рет 12 мг/кг, емдеудің кейінгі күндері 6-дан 12 мг/кг дейінді құрайды. Емдеу ұзақтығы жұлын-ми сұйықтығына культурологиялық зерттеуден теріс нәтижелер алынғаннан кейін кем дегенде 10 - 12 аптаны құрауы тиіс. ЖИТС-ке шалдыққан балаларда аурудың қайта дамуына жол бермеу мақсатында Флунол® препаратын тәулігіне дене салмағына шаққанда 6 мг/кг дозада күн сайын қабылдау ұсынылады.

Өңеш кандидозын, жүйелік кандидозды және криптококкозды емдеу үшінФлунол® препаратыныңұсынылатын дозасы алғашқы күні 6 мг/кг және кейінгі күндері күніне 3 мг/кг құрайды. Аурудың ауырлық дәрежесіне, науқастың емге сезімталдығына байланысты доза күніне 12 мг/кг дейін арттырылуы мүмкін. Өңеш кандидозы бар науқастар ең кемінде 3 апта және симптомдар тоқтағаннан кейін, ең жоқ дегенде, 2 апта емделуі тиіс.

Орофарингеальді кандидозда Флунол® препаратының ұсынылатын дозасы алғашқы күні 6 мг/кг (тұрақты көрсеткіштерге тезірек жету үшін) және кейінгі күндері күніне 3 мг/кг құрайды. Ауыз-жұтқыншақ кандидозының қайталану мүмкіндігін төмендету үшін ем, ең жоқ дегенде, 2 апта бойы жүргізілуі тиіс.

Зеңдік инфекцияға жол бермеу үшін цитоуытты химиотерапия немесе сәулелік терапия нәтижесінде Флунол® препаратының ұсынылатын дозасы нейтропениядан туындаған ауырлық дәрежесіне және ұзақтығына байланысты күніне 3 - 12 мг/кг құрайды.

Төрт апталыққа дейінгі жаңа туған нәрестелер: Жаңа туған нәрестелерде флуконазол баяу шығарылады. Өмірінің алғашқы екі аптасы ішінде басқа да балалардағыдай дозалар пайдаланылады, алайда 72 сағаттық аралықпен. Үшінші және төртінші апта ішінде сол доза 48 сағат аралықпен тағайындалады.

Жаңа туған нәрестелерде өмірінің алғашқы екі аптасы ішінде (әрбір 72 сағат сайын 12 мг/кг) және одан кейінгі екі аптасында (әрбір 48 сағат сайын 12 мг/кг) ең жоғары рұқсат етілген дозадан арттырмау ұсынылады.

Бүйрек функциясының жеткіліксіздігі бар балаларға қатысты флуконазолға фармакокинетикалық зерттеулер жүргізілген жоқ.

Шала туған нәрестеде фармакокинетикалық зерттеулерге қатысты экспериментальді айғақтамалар шектеулі. Шала туған нәрестеге өмірінің алғашқы 2 аптасы ішінде (гестациялық жасы 26-дан 29 аптаға дейін) ұзаққа созылған жартылай шығарылу кезеңіне байланысты ересек балалардағыдай дозалар тағайындалады, бірақ әрбір 72 сағат сайын қабылдау керек. Өмірінің алғашқы 2 аптасынан кейін күніне бір рет қабылдау керек.

Егде жастағы пациенттер: Препаратты егде жастағы адамдарға тағайындағанда, бүйрек функциясының жеткіліксіздігі жоқ болған жағдайда, дозаны түзету қажет емес. Бүйрек функциясының жеткіліксіздігі жағдайында (креатинин клиренсі минутына 50 мл-ден азырақ = секундына 0,8 мл жуық) дозалау режимін түзету төменде берілген сызбаға сәйкес жүргізіледі.

Бүйрек функциясы төмендеген пациенттер: Бір реттік дозамен емдегенде дозаны түзету қажет емес. Көп реттік дозаларды қабылдап жүрген, бүйрек функциясының жеткіліксіздігі бар пациенттер (соның ішінде балалар) үшін тәуліктік бастапқы екпінді доза 50-ден 400 мг-ге дейінді құрайды,кейінгі тәуліктік доза (көрсетіліміне сәйкес) келесі кестеге сәйкес азаяды.

Жағымсыз әсерлері

Жиі:

- бас ауыру, теріде бөртпелер

- жүректің айнуы және құсу, іштің ауыруы, диарея

- АСТ, АЛТ және сілтілік фосфатаза мәндерінің клиникалық тұрғыдан едәуір жоғарылауы

Кейде:

- қажығыштық, мазасыздық, астения, гипертермия, конвульсиялар, бас айналу

- парестезия, вертиго, қышыну, қатты терлеу, анорексия, іш қату, диспепсия, метеоризм, ауыздың кеберсуі, дәм сезімінің өзгерулері

- миалгия, ұйқысыздық, ұйқышылдық

- холестаз, сарғаю, жалпы билирубиннің клиникалық тұрғыдан едәуір жоғарылауы, анемия

Сирек:

- уытты эпидермальді некролиз, терінің эксфолиативті аурулары (Стивенс-Джонсон синдромы), анафилаксия

- тремор, құрысулар

- Квинке ісінуі, беттің ісінуі

- алопеция

- бауыр функциясының жеткіліксіздігі, гепатит, бауыр некрозы, бауыр тіндерінің зақымдануы

- лейкопения, нейтропения, агранулоцитоз, тромбоцитопения

- гиперхолестеринемия, гипертриглицеридемия, гипокалиемия

- көп формалы қарыншалық пароксизмальді тахикардия, QT аралығының ұзаруы

Бала пациенттер:

Бала пациенттерде жағымсыз реакциялардың сипаты мен жиілігі ересек пациенттердегі осындайлармен ұқсас.

Қолдануға болмайтын жағдайлар

- флуконазолға немесе азол туындыларына немесе препараттың кез келген басқа компоненттеріне жоғары сезімталдық

- QT аралығын ұзартатын және CYP3A4 ферменті арқылы метаболизденетін астемизол, эритромицин, цизаприд, пимозид, хинидин, амиодарон, терфенадин сияқты дәрілік препараттармен бір мезгілде қабылдау

- сирек тұқым қуалайтын галактоза жақпаушылығы, лактоза жеткіліксіздігі немесе глюкоза-галактоза мальабсорбциясы аурулары бар пациенттерге

- жүктілік және лактация кезеңі.

Дәрілермен өзара әрекеттесуі

Антикоагулянттар: Флуконазолды және кумарин туындыларын (варфаринді) бір мезгілде қабылдау протромбин уақытын ұзартады. Кумарин туындыларын қабылдап жүрген пациенттерде протромбин уақытының мәнін мұқият бақылау қажет.

Терфенадин: Кейбір азолдарды қабылдауды зеңге қарсы азольді қатардың препараттарын және терфенадинді бір мезгілде қабылдап жүрген пациенттерде QT аралығының ұзаруы салдарынан туындайтын жүректің ауыр аритмиясымен байланыстырады. Күніне 200 мг флуконазол қабылдағанда QT аралығының ұзаруы білінген жоқ. Күніне 400 мг немесе 800 мг флуконазолды қабылдағанда қан плазмасындағы терфенадин деңгейінің едәуір жоғарылағаны байқалды.

Астемизол: Флуконазолды және астемизолды бір мезгілде қабылдау пациенттің қан плазмасында астемизол концентрациясының жоғарылауына әкелуі мүмкін, мұның салдары сирек жағдайларда көп формалы қарыншалық пароксизмальді тахикардияның туындауына әкелетін QT аралығының ұзаруы болып табылады.

Гидрохлоротиазид: Бір мезгілде қолдану қан плазмасында флуконазол концентрациясын 40%-ға арттырды. Диуретиктерді бір мезгілде қабылдап жүрген пациенттерде флуконазолдың дозасын өзгерту қажет емес.

Сульфонилмочевина препараттары: Сульфонилмочевина туындыларымен (хлорпропамид, глибенкламид, глипизид және толбутамид) бір мезгілде қабылдағанда қандағы глюкоза деңгейін мезгіл-мезгіл бақылап отырған жөн және, егер қажет болса, сульфонилмочевина дозасын азайтқан жөн, өйткені флуконазол жартылай ыдырау кезеңін ұзартады.

Тез әсер ететін бензодиазепиндер (мидазолам, триазолам): Флуконазол мизодаламның концентрациясын арттырады, бұл психомоторлы функцияға ықпалын тигізеді. Флуконазолды және бензодиазепиндерді қабылдап жүрген пациенттер медициналық бақылауды керек етеді және бензодиазепиндердің дозасын төмендетуді керек етуі мүмкін.

Фенитоин: Флуконазолды және фенитоинды бір мезгілде қабылдағанда қан плазмасындағы фенитоин деңгейі клиникалық тұрғыдан едәуір жоғарылайды. Фенитоинның жоғары концентрациялары тыныс алу функциясының жеткіліксіздігіне әкелуі мүмкін. Пациентті бақылау және, қажет болса, фенитоинның дозасын түзету керек.

Рифампицин: Флуконазолдың жартылай шығарылу кезеңін 20%-ға қысқартады. Флуконазолмен және рифампицинмен бір мезгілде емдегенде флуконазолдың дозасын арттыру қажет.

Рифабутин: Флуконазолды және рифабутинді бір мезгілде қабылдау қан сарысуындағы рифабутин деңгейінің 80%-ға дейін жоғарылауына әкелуі мүмкін. Флуконазол мен рифабутинді бір мезгілде қабылдаған кейбір пациенттерде увеит пайда болуы мүмкін, сондықтан мұндай пациенттер бақылауды керек етеді.

Цизаприд: Цизапридті және флуконазолды бір мезгілде қабылдауға болмайды.

Циклоспорин: Бүйректі ауыстырып салғаннан кейін пациенттерді фармакокинетикалық зерттеу флуконазолды күніне 200 мг дозада қабылдаудың организмде циклоспорин мөлшерін біртіндеп арттыратындығын анықтады. Алайда күніне 100 мг көп реттік дозадағы флуконазол сүйек кемігін ауыстырып салғаннан кейін пациенттерде циклоспориннің деңгейіне ықпалын тигізген жоқ. Флуконазол қабылдап жүрген пациенттерде циклоспориннің деңгейін бақылап отыру ұсынылады.

Теофиллин: Флуконазол қан плазмасындағы теофиллиннің деңгейін арттырады. Теофиллиннің жоғары дозаларын қабылдап жүрген немесе өзге жағдайда теофиллинмен уыттанудың жоғары қаупіне ұшыраған пациенттер флуконазолды қабылдау кезінде дәрігердің бақылауын керек етеді, және теофиллинмен уыттану белгілерінде емдеуге тиісінше түзету енгізген жөн.

Зидовудин: Флуконазолдың жоғары дозалары (400 мг және одан көбірек) қан плазмасында зидовудиннің деңгейін едәуір арттырады, бұл зидовудиннің негізгі метаболитке айналуын тежеуімен байланысты болуы мүмкін. Осы екі препаратты қабылдап жүрген пациенттер зидовудиннің жағымсыз әсерлерінің пайда болу жағдайларын бақылауды керек етеді.

Такролимус: Флуконазол қан плазмасындағы такролимустың деңгейін оның уыттылығының ықтимал клиникалық көріністерімен (нефроуыттылық, гипергликемия, гиперкалиемия) арттырады. Осы препараттарды бір мезгілде қабылдаған жағдайда қан плазмасындағы такролимус деңгейін бақылау және қажет болғанда оның дозасын төмендету қажет.

Ішуге арналған контрацептивтер: Флуконазолды 50 мг дозада және ішуге арналған контрацептивтерді бір мезгілде қабылдағанда, қан плазмасында этинилэстрадиол мен левоноргестрел деңгейлерінде елеулі өзгерістер байқалған жоқ, алайда күніне 200 мг флуконазол қабылдағанда этинилэстрадиолдың және левоноргестрелдің концентрациясы, сәйкесінше, 40%-ға және 24%-ға артты. Флуконазолды осындай дозада көп рет қабылдаудың ішуге арналған контрацептивтердің тиімділігіне ықпал ету ықтималдылығы азырақ.

Флуконазолды тамақпен, циметидинмен, антацидтермен бірге немесе сүйек кемігін ауыстырып салумен байланысты организмнің толық сәулеленуінен кейін пероральді түрде қабылдау флуконазолдың сіңуінің клиникалық тұрғыдан елеулі нашарлауына әкелмейді.

Гидроксиметилглутарил-кофермент A-редуктаза (ГМГ-КоA-редуктаза) тежегіштері: флуконазолды аторвастатин және симвастатин сияқты CYP3A4, немесе флувастатин сияқты CYP2C9 арқылы метаболизденетін ГМГ-КоA-редуктаза тежегіштерімен бір мезгілде тағайындаған кезде, миопатияның және қаңқа бұлшықеттерінің жедел некрозының (рабдомиолиз) даму қаупі ұлғаяды. Егер қатар емдеу қажет болса, науқас миопатия және рабдомиолиз симптомдарының пайда болуына қатысты бақылануы тиіс, сондай-ақ креатинкиназа деңгейіне бақылау жүргізілуі тиіс. Егер креатинкиназа деңгейінің жоғарылағаны байқалса, немесе егер миопатияның / рабдомиолиздің дамуы диагностикаланса немесе оған күдіктенсе, ГМГ-КоA-редуктаза тежегіштерін қабылдауды тоқтатқан жөн.

Лозартан: Флуконазол лозартанның, лозартанмен емдеу кезінде ангиотензин ІІ рецепторларының антагонизмінің үлкен бөлігіне жауап беретін, белсенді метаболитке (Е-3174) метаболизденуін тежейді. Науқастар артериялық қысымын үнемі бақылап отыруы тиіс.

Метадон: Флуконазол қан сарысуында метадонның концентрациясын арттыруы мүмкін. Метадонның дозасын түзету қажет болуы мүмкін.

Қабынуға қарсы стероидты емес препараттар (ҚҚСП): Флуконазол CYP2C9 арқылы метаболизденетін ҚҚСП (мысалы, напроксен, лорноксикам, мелоксикам, диклофенак) жүйелік әсерін күшейтуі мүмкін. ҚҚСП-пен байланысты жағымсыз әсерлеріне және уыттылығына жиі мониторинг жүргізу ұсынылады. ҚҚСП дозасын түзету қажет болуы мүмкін.

Флуконазолдың, жоғарыда аталғандарды қоспағанда, басқа препараттармен өзара әрекеттесуіне зерттеулер жүргізілмегендігін ескерген жөн, бірақ мұндай өзара әрекеттесулер жоққа шығарылған жоқ.

Айрықша нұсқаулар

Емдеуді клиникалық-гематологиялық ремиссия пайда болғанға дейін жалғастыру қажет. Емдеуді мезгілінен бұрын тоқтату аурудың қайталануына әкеледі. Сирек жағдайларда бауырға жедел уытты әсері білінеді. Гепатоуыттылығы мен флуконазолдың күн сайынғы жалпы дозасы, емдеу ұзақтығы, пациенттің жынысы немесе жасы арасында айқын байланыс байқалған жоқ. Әдеттегідей, емдеуді аяқтағаннан кейін бауыр функциясы қалпына келеді. Патологиялық бауыр көрсеткіштері және флуконазолмен емдеу арасында нақты байланыс байқалған жағдайларда, гепатоуыттылықтың өршу қаупіне байланысты, пациенттің жай-күйін мұқият бақылаған және, қажет болса, препарат қолдануды тоқтатқан жөн. Сирек жағдайларда флуконазолды қабылдау терінің аллергиялық реакцияларын өршітуі мүмкін. Экзантеманың, соның ішінде терінің қыртыстануының өте жиі жағдайлары, мысалы, Стивен-Джонсон синдромы, сондай-ақ уытты эпидермальді некролиз тек ЖИТС-пен ауыратын науқастарда ғана байқалады. Күрделі аурулары бар (көбіне ЖИТС және қатерлі ісік тәрізділердің пайда болуы) науқастарда флуконазолмен емдеу кезінде өліммен аяқталу сирек жағдайларда байқалады. Беткейлік дерматомикозы бар науқаста флуконазол қабылдаудан болуы мүмкін деп болжанған экзантема басталған жағдайда препарат қабылдауды тоқтатқан жөн. Инвазиялық немесе жүйелік микозы бар пациенттер мұқият бақылауды керек етеді, және терінің буллезді зақымдануы немесе полиморфты экссудативті эритема пайда болған жағдайда флуконазолмен емдеуді тоқтату керек. Терфенадинді және флуконазолды (күніне 400 мг-ден азырақ дозада) бір мезгілде қабылдағанда дәрігердің мұқият бақылауы қажет. Сирек жағдайларда азольді топтың препараттарын қабылдаған кезде анафилаксиялық реакциялар білінеді. Кейбір азолдарды, соның ішінде флуконазолды қабылдауды QT аралығының ұзаруымен байланыстырады, бұл екі бағыттық қарыншалық тахикардияның сирек жағдайларын туындатады. Бұл әсерлер ауыр негізгі ауруы бар және, миопатия, электролиттік теңгерімнің бұзылуы және осы бұзылулардың пайда болуына мүмкіндік беретін препараттарды бір мезгілде қабылдау сияқты көптеген қауіп факторлары бар пациенттерде өте жиі байқалды. Осындай потенциалды проаритмогендік жағдайлары бар пациенттер флуконазолды сақтықпен қабылдағандары жөн.

Жүктілік және лактация кезеңі. Жүктілікте флуконазолдың қауіпсіздігіне адекватты және қатаң бақыланатын зерттеулер жүргізілген жоқ. Жүктілік кезінде флуконазолды қолдану ана үшін болжамды пайдасы шарана үшін потенциалды қаупінен басым болған жағдайларда ғана ықтимал. Флуконазол емшек сүтінде қан плазмасындағы концентрацияларда табылады, сондықтан лактация кезеңінде оны қолдану ұсынылмайды.

Көлік құралын немесе потенциалды қауіпті механизмдерді басқару қабілетіне дәрілік заттың ықпал ету ерекшеліктері

Автомобильді басқарғанда немесе техниканы пайдаланғанда сақтық танытқан жөн, өйткені бас айналу немесе құрысулар пайда болуы мүмкін.

Артық дозалануы

Симптомдары: жүректің айнуы, құсу, диарея, елестеулер, құрысулар.

Емі: симптоматикалық ем жүргізу, препарат қабылдауды тоқтату, асқазанды шаю, жеделдетілген диурез. 3 сағаттық гемодиализден кейін қан плазмасындағы флуконазол деңгейі шамамен 50%-ға төмендейді.

Шығарылу түрі және қаптамасы

Алғаш ашылғаны бақыланатын, бұрап жабылатын пластмасса қақпағы бар, қызыл-сары түсті шыны құтыларда 70 мл шәрбаттан. Құтыға өздігінен желімденетін заттаңба жапсырылған.

1 құты өлшеуіш қасықпен немесе өлшеуіш стаканмен және медициналық қолдану жөніндегі мемлекеттік және орыс тілдеріндегі нұсқаулықпен бірге өндіруші фирманың голограммасы бар картон қорапшаға салынған.

Сақтау шарттары

25 ⁰C-ден аспайтын температурада сақтау керек.

Балалардың қолы жетпейтін жерде сақтау керек!

Ашқаннан кейін бөлме температурасында 14 күннен асырмай сақтау керек.

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші/Тіркеу куәлігінің иесі

«Нобел Алматы Фармацевтикалық Фабрикасы» АҚ

Қазақстан Республикасы

Алматы қ., Шевченко к-сі 162 Е.

Қазақстан Республикасы аумағында тұтынушылардан дәрілік заттың сапасы жөніндегі шағымдарды (ұсыныстарды) қабылдайтын және тіркеуден кейін дәрілік заттың қауіпсіздігін бақылауға жауапты ұйымның атауы, мекенжайы және байланыс деректері (телефон, факс, электронды пошта):

«Нобел Алматы Фармацевтикалық Фабрикасы» АҚ

Қазақстан Республикасы, Алматы қ., Шевченко к-сі 162 Е.

Телефон нөмірі: (+7 727) 399-50-50

Факс нөмірі: (+7 727) 399-60-60

Электронды поштасыnobel@nobel.kz

Қалалар